بلوچی گوگل تہا چون کئیت؟

19 May 2021Junaid Qadir1 min read55 Words
بلوچی گوگل تہا چون کئیت؟

ھر دو، چار یا شَش ماه گوزیت ھمے میسج شنگ بیت کہ بیا اِت اوٹ بہ دئے اِت کے بلوچی گوگل تہا بئیت۔ چِد شَرّتر ایں گپ چے بیت کہ بلوچی زبان گوگل تہا بیبت۔ بلے آئی وستہ مارا بلوچاں لہتے کار کنگی انت۔

سالے پیسر انچو نوجواناں جہہ جتگ ات کہ بلوچی بائید انت گوگل تہا بیبیت، منا وٹس ایپ گروپے ءِ تہا ھوارش کُت۔ من آھان ءَ گوشت کہ شمارا کار کنگ لوٹیت، گوشتئے کہ ھئو ما کار کنیں۔ من گوشت یک انچیں سائیٹے جوڈ بہ کن اِت کہ اودا نبشتہ کار بیا انت ءُ وتی وتی نبشتہاں شنگ کت بہ کن ان۔ ھو کتئے بلے ھِچّ نہ بوت ءُ بے ھال بوت انت۔ لہتے وھد گوست ءُ من دست پاد جت ءُ شش ماہ ءِ تہا کِسّہ (https://kissah.org) نام سرا یک پلیٹ فارمے جوڈ کُت کہ آئی تہا ھر کَس رِجسٹر کُت کنت ءُ وتی کِسہاں شنگ کُت کنت۔ ھما دوستاں کہ منا کُمک کت آھانی مدام مِنّت وار اوں۔

کِسّہ پلیٹ فارم ءِ پئیمیں مارا بازیں دگہ بلوچی پلیٹ فارم لوٹیت کہ اودا مردم بلوچی نکان جوڈ کُت بہ کنت، چو کہ بلوچی آرٹیکل، بلاگ، ولاگ(وی لاگ) گوں انگریزی سَب ٹائیٹلاں، ھالانی سائیٹ، انگریزی ءُ ایدگہ زبانیں چہ رجانک کتگیں، کتاب ءُ بازیں دگہ۔

نوں کائیں ھمے نوکیں میسج نیمگ ءَ کہ ھر کَس دیما راہے دئیگا انت۔ ءُ اپسوز ءِ گپّ ایش اِنت کہ آ میسج ھم اردو تہا اِنت۔

اے کُلہ ءِ تہا داتگیں لِنک ءِتہا چوش نبشتہ انت

https://support.google.com/translate/thread/33500780/add-balochi-language-in-google-translate?hl=en

https://support.google.com/translate/thread/1647303/my-language-is-missing?hl=en

بِزاں کہ گوگل ءِ رد ءَ یک زبانے ھما وھدا زورگ بیت کہ

  • آ زُبان ءَ رھندے است ءُ نبیسگ بیت

  • آ زُبان وِبّ بہ زاں اِنٹرنِٹ سرا گوں دگہ زُبانی تہا رجانک کنگ ءِ ھواری ءَ یکّوُئی کارمرز کنگ بیت، چو کہ ھال، نبشتانک، نسکان ءُ کتاب، سرکاری وِبسائیٹانی تاک ءُ ایدگہ نبشتگ ایں چیزّ۔ ءُ گوگل ءِ رِدا اے نکان لَکّانی کساس ءَ ھمے زُبان ءِ لبز گوں (انگریزی) بدل آں است بہ بنت۔

  • آ زُبان ءِ گپ کنوک دلمانگ انت کہ آ گوگل گوما ھور بہ بنت ءُ گوگل ءِ "ٹرانسلیٹ کمیونِٹی" تہا داتگیں "کار"آنی کُمک ءَ گوگل ءِ کمک ءَ بہ کن اَنت۔

گُڈ سرا منی دَزبندی گوں شماایش انت کہ ھر چیز ڈیمانڈ ءُ پروٹیسٹ کنگا چہ نہ رسیت، کمَے شُما ھم دست ءُ پادے بہ سُرین اِت۔ انچو کہ من بُرزا گوشت، پہ وت بلاگے جوڈ بہ کن اِت ءُ بلوچی تہا نبشتہ بہ کن اِت، ءُ دگہ زبانانی نکاناں بلوچی تہا ءُ بلوچی نکاناں انگریزی تہا رجانک بہ کن اِت ءُ انٹرنٹ سرا ایر بہ کن ات۔ امیت اِنت کہ ھیر بیت۔

اگاں اے نبشتانک تہا رَدیے گِند اِت، الَم کمِنٹ بہ کن اِت ءُ منا بہ گوش اِت، شمئے وھد کشگ ءِ با مِنّت۔

جَہل ءَ کمِنٹ بہ کن اِت کہ شما چون کنٹریبیوٹ کُت کن اِت؟۔

Share this post
How do you feel about this article?